Search form

Luku 1

Lukukaho luhuwa maya jeko Teyopilasida mibo ga.

1Muki wewenasiya luwawateu Jisesimamo le soto pibo nesama li emesalo moliki luhuwa jebo. 2Monoka likaka wewenasiya mudai wehe likikiya aya luhuwa ji lemebo nenako, 3nemo aya gawa lalo maya moletoko le wehe loko elekoloya, Teyopilasi uliki wene yamalae, luhuwa maya le eto eto oko je noemoe. 4Lepekokoya emo aya wehe loko ga ulawa neyo loko elitane.

Noku udobetokaka we Joni soto pitibomu ohuwa hukoko libo.

Judiya mikaukaya uliki we napa Helotiya ujapa oko nebo yulakaya, ito Omailoka jokila he mekaka weya ulilaya Jekolaeyaya Abaijada nalala minabokuti nebo ne. 5+ Aya weya mena mako Elonida ouvamelauti liboya ulilaya Elisabeti. 6Edimoya Omaimidana omudaloya duka laloki minaidanaki, Omailimo lo hukoko libo gaya lihimanipo minamibo miniki eli-liki minaiye. 7Elisabetiya ohuda mena nenako, oluhonipo etamiki miniki iloho laiye. 8Jekolaeyada yowanulo laini maya monoka numuda napauma uda jitabo onawama alili okaiyoko, 9Omailoka jokila hi mikaka wesiya likaka abo nesa liki yowanunipo maya li eto eto iki li-liki niwayoko, Jekolaeyadama Omaimidana uda je mo liki ilime eto ikayoko, monoka numuda napa ulauma yoweko nuvala lalo wibo nesalotima Omai uda je nomiyoko, 10muki wewenama oho ulau miniki we napaloka liki minae. 11Sa-ikiya nilayoko, We napamidana okanaki wela makoya niseko uda jikaka namabetamidana lamawakalokama sinone. 12Sakoya sinoneyoko, Jekolaeyamamo mudakadanaki ololo oko upau lekadanaki omodala wiye. 13Omodala wokaiyoko, okanaki wemamoya sa-lokoya lo miye: Jekolaeyao, omodaka wamideyo. We napamidana epoka noladawoya eleneyo, menaka Elisabetimamo oluholaki minoko oluho etatibo maya ulilaya Joniyo loko molo. 14Mulukau lalo eleko oli mekolane. Sa-ideko muki wewenasiya aya oluho soto pitibokumuya dumu helitibo ne. 15+ Sa-ideko aya oluhomoya We napamidana omudalaloya we napa lolo oko netiye. Ito aya oluholimoya waeni nohe ito nei nohe moseko dolada ohumanauya nedeko, Omaimidana weuna oluholimoya ukauya waitetiye. 16Sa-okadeko, Isilaelo wewena mukima lahelamibo anugutima dilipe lika okadekoya, we napa Omailokagoya nisikilae. 17+ Ito Ilaija okaka ibo nesa leko abuha moloko We napatemidana anula wiletoko gala maya lo soto molokaka oko minakolaiye. Sako minoko olopa wewenasida ito oluho lasomosolasida dukauma le nupa obetatiye. Sa-okadeko, ga eli hulikaka wewena maya duka laloki wewenasi nielebo monokaya elikilae. Sakoya ya yowanuya lideko, muki wewenasiya we napamuya ewa iki minakilae.

18Okanaki wemamoya sa-loko lo mekaiyoko, Jekolaeyamamoya onoto leko sa-loko lo miye: Menaneki ito nemokiya aloya iloho molokoinako watiya lane loko elamoe. 19+ Loko liyoko, okanaki wemamo sa-loko lo miye: Ele-minape. Nemo ulineya Gebiliyoloma minoe. Nemoya Omaimidana omudalo minoko sako nobo we maya emokahoya noli hekaiyoko lemeko ga lalo maya lo noemoe. 20Sa-oneyo, elo. Ga maya lo emoboya watiya lane loko lamaniyoko epakaya he lagoli okadeko nei moloko mino-loko wokoma lo emobo aya niseko ulolotokadako alikaya ga letane. Nemo nolobo gaya hataga amekolaiye.

21Loko lokaiyoko, Jekolaeyama monoka numuda napauya sa-ikiya alo-nalo likaibolimoya onawa hana minokaiyoko nenako, muki wewenama ewa iki miniki data etipa ke. 22Sa-ikayoko nenako, Jekolaeyama alikaya lemekoko ga lo bitibo nesamuya opa iye. Gala maya wehe lamiyoko maya wewenamasiya monoka numukuya wamokidana mudaonetiye. Liki nilayoko Jekolaeyamamo aya gama nena nena oko lo bituhe lokadanaki adelotima aweyaha oko sa-iye, ga maya lo bamidanakiya. 23Sakoya neyoko, yowanu litabo onawama suwokaiyoko Jekolaeya le numutokama le wili jeko wiye.

24Sa-ikayoko, alika maya menala Elisabetima oluholakiya ne. Sa-okaiyoko, ilohomoki oluho ohumana jiye liki litahe loko ukada lade maloka suwiyoko halukoko numukugoya nedanaki sa-loko liye: 25We napamamo molaibo onawa maya alili okaiyoko ohuda menama minobomuye loko nilime lalo onetaidanaki, owane helobo nesama olotiya le suwonetokaiye.

Jisesi maya soto pitibomu ohuwa hukoko libo.

26Loko liyoko, oluholaki minoko ukada lade maloka suwoko ito maloka makoko iyoko le hulikaiyoko, Omaimoya okanaki we Gebiliyoloda oli hekaiyoko, Galeli ebaku Naseleti numutoma wiye. 27+ Naseleti numutokaya yaha mena makoya uliwaya Mele loko ne. Aya menaya Dewitida ouvamela yuhauti we Josepuda mudai molikayoko ne. 28Sa-iminabo nenako okanaki wemamo aya oluma nebotoka nisekadanaki sa-loko lo miye: Omaimo ilime lalo oetokaiyoko minadawo olulika hulu emotoka minadeyo. We napama emotokaya ne. 29Loko okanaki wemamoya lo mekaiyoko, Melemamo elibo maya eda elokaiyoko, sa-loko ukalaukaya eliye: Ladawo gamidana monawaya nenae loko netiye. 30Loko noeliyoko, okanaki wemamo sa-loko lo miye: Mele, omudaka wamideo. Omailimo muda-elaiboya wehe lo-minane. 31+ Oluhokaki minoko oluhoka etadadawoya ulilaya Jisesiyo loko etoko molo. 32+ Emoya napa-napa we lolo oko nedeko, Yowau wemidana ipalamae liki litabo neyo, ito We napa Omailimoya latala Dewitida adakolilama ohetokadeko we napa lolo oko netibo ne. 33Ito Jekopuda ouvamela yuhautiya ujapa owa owa oko minakolaiye. We napa lolo etibomidana elewoleya suwamoko hana-pana mino-loko woko minakolaiye. 34Loko okanaki wemamo lokaiyoko, Melemamo sa-loko lo miye: Nemoya wauneki omeko minamoiye. Sa-ominonako, noladawo gaya nena nena okoma niseko litibo ne. 35Loko liyoko, okanaki wemamo sa-loko lo miye: Omaimidana weuna oluholimoya emo minadawotoya lemekolaiye. Ito Omaimidana elewoleyalalimoya ilime lalo oetakolaiye. Sa-ekolainako, ipaka etadawoya eto oko nebo Omaimidana ipalae liki likilae. 36-37+ Ito ga mako lo emekoloyo, ele-mino. Emoka minadawo yuhauti mena iloho Elisabeti maya oluholaki neyoko ukada 6-pala alo wokaiye. Agae, ohuda menama neboya, Omailimo lolo ametibo nesaya ma minamibo nenako olotiya oluholaki ne. 38Loko lokaiyoko, Melemamoya sa-loko lo miye: Nemoya We napamidana elekele olula minoe. Sa-ominonako, noladawo nesaya aha le soto pitiye, loko lokaiyoko, okanaki wemamo hulomikoko wiye.

Melema Elisabeti nebotoka wiye.

39Melema mino hana amokoya Judiya ebatoka weuha makomauya numuda mako nebotoka wiye. 40Wokoya aya weuhau Jekolaeyada numudalauma yoweko menaladama eke loetaiye. 41Sa-okoya eke noloetaiyokoya, Elisabetida ohumanautima oluhomamo hugili oko momoga iyoko eliye. Sako elekoko, Omaimidana weuna oluhomamo Elisabetida obohalauma lemeko waitoko minokaiyoko, 42ga napauti Meleda maya sa-loko lo miye: Omailimoya muki menakipauti ilime eto okoko makuya emekaiyo, ito oluhoka etadawokiya lusa voetokaiye. 43We napanemidana idola minane. Mena ebili maya minoboya nemotokaya nenaha iyoko nisene. 44Elo. Eke adoha nolonetaniyoko ohumaneuti oluhonema momoga oko omola adoha noyowiye. 45Ito emoya We napamamo lo mibo ga maya woko letiye loko elewole oko ata elekaniyoko Omailimo maku mekaiye. Yamuya eloyoko wati iye.

Meleda maya oli meko Omaimidana epoka libo.

46+ Loko liyoko, Melemamoya sa-loko lo miye:

Nemoya nukaneya We napamidana epoka noloe. 47Ito weuna oluhonedunuya Omaimo lahelametibo nesauti nilimitibo wemuya oli meko epoka noloe. 48Ito nemo elekele oluwa lemeko minobo maya olotiya nilime-loko noyowiye. Sa-noinako, alikaya mini-liki yowitabo wewenasi nemodamu Omaimo maku nimibo menae liki likilae. 49Sa-onenako, Omaiya elewoleyalaki welimo nemotoka saina ulawa le soto molokaiye. Sa-onenako, emo ulila maya eto okoya ne. 50Emoda oli mitabo wewenaya mini-liki yowiki minaboya Omailimoya nasahili obetokaka noiye. 51Ito edimonipomu eleyoko yowekaka noibo wewenaya eimola elewoleyalaloti dilipe hulokaka noiye. 52Ito duliki wesi sa-inayokoma onowelaki siyaloti dipisoko le hulikaiyoko mohiliki limikaka niae. Sakokoya limiki minabo wewenasida duli maya leko yowekaka noiye. 53Ito uvaminanipo minamibo ito nodemu helikaka niabo wewenasida maya saina ihilawa biyoko niki dohumanipo iki minikaka niae. 54Ito uvaminanipoki wewenasidama hulobetokaiyoko yowiki limiki minikaka niae. Omaiya ukala laloki we nenako, lemo Isilaelo wewena elekele oetoko minudawolaya lilime lalo oletaiye. 55+ Latate Aebalahamu ito ouvamela mota mini-liki nisiki minabo wewenalokaya ga loko hukobetoko sa-ibomidana ihilawama soto pekaiye.

56Melemamo sa-lokokoya Elisabetite maya miniki ukada loweki makokiya le hulikoko akuya numudaloka le wili jekoya wiye.

Noku udobetokaka we Joni maya soto piye.

57Sa-iyoko Elisabeti maya oluho etatibo onawama nisekaiyoko, ipalaya etaiye. 58Etokaiyoko, muki wewenalale ito iwelalesiya We napamamo he elowo oetaibo ga maya elikikiya Melelemaki mulunipou wati iye. 59+ Sa-okaiyoko, onawa 8-pala yamidana sako wokaiyoko, Omaimidana ganelama aya ipamidana upalaloma moloetatune likiki muki wewena nisiki li esa ikiki ulilamaki aholada ulilalo molatune likiki lae. 60Liki layoko, dolamamo auha lokoko O'e. Ulilaya Joniyo loko molatune. 61Loko lokaiyoko, sa-liki li me: Aiye, emo latakalesida ulinipo mako sako minamiye. 62Liki auhaya likadanaki Jekolaeyadamamu ipalada ulilama nenae loko molatihe likadanaki dadelotima aweyaha ayoko, 63Jekolaeyamamo pepama liki nisilo loko adelotima aweyaha okaiyoko, liki nisiki mikayoko, yaloma ulila maya Joniyo loko luhuwa jiye. Jekaiyoko, elikadanakiya agae, likiya lae. 64Sa-iyoko, Jekolaeyada epa ulumalama enemane oko wehe liyoko, Omaimidana epoka liye. 65Sa-iyoko, iwelale malokasiya elikadanaki domodanipo adoha wonebo ne. Sa-iyoko Judiya ebakuka bolaukahena ito muki numutokahena aya gama wetome-katome ayoko, 66muki wewenasiya wego menago ganipoma elikikiya eli madonipou moliki sa-liki lae: Oluhoya napa lekoko nenaha etihelae liki lae. Liki laboya, We napamidana elewolelama aya oluholo neyoko mudaikiki labo ne.

Jekolaeyakaho ohuwa hukoko libo ga.

67Ito ahola Jekolaeyadaya Omaimidana weuna oluholimo ukalau lemeko minokoko ilime lalo okaiyoko, ga mako sa-loko ohuwa hukoko liye:

68We napate Omaimoya Isilaelo wewena lemodaya lilime wati okadanaki lahelamibo nesautima lilimekaiye. 69Elekele oluhola Dewitida ouvamela mota lahelametibo nesauti lilimitibo ahoda maya le sinoko hekaiye. 70Hapaya eimola epalauti ga likaka wesiya dilime lalo iyoko, ga mako koha moliki sa-likima liminaboma ne: 71Lowa hi limiki asowalaki nesa li limiki sa-niabo wewenasida dadeutiya lilime oli ekolaiye. 72Latatelesidama eke lobetoko dilimituwe loko lo molaibo ne. Ga loko wasa jekaka gaya liboyaloya ele-minoko sa-oletakolaiye. 73Ito latate Aebalahamudama sa-loko elewole oko lo moloetaibo nenako, 74yamuya lowa ulatelo wewenatelesilokatiya lilimekadeko hulu oko minakolune, 75ito lukaya eto eto oko minoko gateya minamideko elekele oluhola lolo oko mino-loko woko minoko heletune. Sa-onenako, Omaimidana epoka letune. 76+ Ito emo maya ipalikaya, We napamidana gala lo-lele moneko anulaya wiletataniyo, emokumuya okulumauti Omaimidana epalauti ga lokaka we likiya likilae. 77Emokahoya Omaimo wewenalale yuhasida esenipo vobetaibo gama lo bekaniyoko, eli wehe likadeko lihimanipoma le hulobetakolaiye. 78Lemo Omaitemoya lemo milumate elekaka noinako, emo letibotoya okulumaloya okululuwa nohokeko 79+ lubukamidana ukauka ito helekaka anuguya minudawo wewenaya leya jeko le lameda loletakolaiye. Sa-ideko, onawa lalomidana anulaya soto pekadeko yauya wekolune,

loko Jekolaeyakahoya liye.

80Ito maya ipaya napa leko elewole okoko mumusopa mikaloka woko nedeko, yowanu litibo onawaya alili okaiyoko, nisituwe lokoya Isilaelo wewenasitokaya soto pene.

Monoka Madona Ohatama

©Wycliffe Bible Translators, Inc.

More Info | Version Index