Search form

Taetasi 3

Wati oko emesalo molatudawo ga.

1Emo ujapakalo minabo wewenasida maya akuya esewau leko sa-loko lo bo: Edimoya kiyapenipo ito gamaninipolesida elekele ibitiki yowi-minabo wewenasidaya elekele ibitiki ganipo elitae. Sa-ikiki lalo yowanu aito-aitomidana waitoneboya olo liki litae. 2Sakikiya liwi letiwi iki lowa moila hamitae. Sa-ikiki hulu iki miniki muki wewenasida maya dukanipoloti dilipi lahelepa itae. 3Hapaya lemotekaho yamidana opa oko nei molokaka nouniyoko, lilimi opa ikaka ae. Sa-okudanaki ga pelesa jeko lelokaka nesamidana elekelewa oetoko minudanaki, wewenasida dilipe opa udanaki, aito wewenasi iki moliki abo nesakidana oko moloko etudawolae lokudanaki, dukau yowe hile hile oko dupamu lelokaka ibo ne. Sakoya sa-minuniyoko, lemodamuya lahelamibo data nikeyoko, edimo depa aha kohalelayoko, lemo lepa aha kohaiduniyoko okaka udawo ne. 4Sa-nouniyoko, alika lilime dowa lokaka we Omaimidana nasahilila ito ukala limibo nesa maya soto pekadanaki olisauti lilimiye. 5Lemoya wehe loko minoko oko moloko udawo nesa maya watiya neyoko, mudakoko samiye. Ukalaya lemoda lemekoe loko ohatama minoko lekomidana ito noku udokakau Omaimidana weuna oluholokati ohatama soto pekaka nesalimoya lilime dowa liye. 6Omailimoya olisauti lilimekaka we Jisesi Kalaestitokati weuna oluhola maya wavu-leko limiye. 7Jisesida nasahililamoya Omaimidana omudaloya lilime wehe lokadeko, elewole ebamuya ubolo minokaka noudawo nesa liki sa-itae loko sa-oletaiye. 8Aya ga maya watiya wehe loko ne.

Ito maya abuha moloko lo bitane loko noeloe. Sa-okadeko Omaimu eli elewole ikaka niabo wewenasi saina lalo letune likigo yowanu wavu-liki litae. Sa-itabo nesaya lalo nesa nenako, sa-ikadeko muki wewenasidaya dilipe wati etibo ne. 9Aya gaya li huli yolalo malo iki minikaka niaboya watiya minamiye, ito ouvamenipoleya hapa yeikalaloka wavu-liki obe-nabe liki mini-liki yowebo ito lowa moila hikaka, ito Mosesekaho lo hukoko libo gamu ligi huligi iki lowa hiwa hiwa ikaka niabo gaya watiya minamibo nenako, ya galoya ele hulikoko emesa mo. 10Maloka wewenasiya lahelamibo ga likadeko, luwakuti hiki pou liki mini maloka maloka ikiki maya yu makokohe ito lowe yupekaheya data liki li bitaboya elamideko maya doli hiki hulikadeko, edimonipogo wiki aitoloka minatae. 11Ga maya noloboya alo ele-minape. Yamidana ga pelesa jikaka wewenaya madonipo opa ibo minadanaki edimonipo iki moliki abolimo monawanipoya lo soto nomolaiye.

Yowanumu loetaidanaki wewena dupamu elaiyoko libo.

12+ Atemasidahe ito Tikikasidahe emotoka doli hekoyoko wikadeko, nemoya Nikopoli numutokaya minatubo neyo, nemotoka nisituwe loko maya abuha molo. Nemoya aya numutokaya lasi okaka yupekaya minatubo nesa lene. 13+ We lowe Apoloki obi ga monawa elekaka ibo we Jenasiyaki edimo monoka yowanulo wisaiye loko nodenesanipoki ito uvaminanipoki le lalo obetatuwe loko abuha molo. Sa-okadeko saina-mainanipomuya ohu jamisaiye. 14Wewena yuhatelesiya yowanu lalo li-liki niwiki duka dowa letiye. Sa-okadeko saina lupamidana le wati okakakumuya nasahili yowanu li-liki niwideko, monokau iki moliki itabolimo ihilawa le soto molakolaiye.

15Nemoki magoina minudawo wewena mukisiya emo upakamu delokaiyoko noloe. Monokamuye liki duka limikaka niabo wewenasida dupamuya nelokaiyoko noloe. Sa-okaiyoko noloyo, yamuya enemane oko lo bitane.

Ito Omailokati nasahili maya edimotoka mino moloko minadeyo.

Monoka Madona Ohatama

©Wycliffe Bible Translators, Inc.

More Info | Version Index