Search form

Luk 9

Zozi 'e -srunɔn 'fuda "fli 'pa 'sia "flivli

(Mt 10.1, 5-14; Mk 6.7-13)

1Zozi 'e -srunɔn 'fuda "fli "bɛ o cin 'yɩ. E -kɔladɩ 'lee 'plɛblɛ -nɔn -wlɛ 'nan -e 'o -yʋ -wlidɩnun -pin minnun -sru, -e 'o -cɛ 'si minnun man. 2E o 'pa 'sia 'nan 'o 'kʋ -a vɩ minnun lɛ 'nan Bali -le mingɔnnɛn -blɩdɩ 'bɔ, te o -cɛ "sia minnun man. 3Zozi "e 'nan -wlɛ 'nan: «Te 'ka fɛ -tʋ 'sia dɩ! -Yɛɛ cɩ "le "tonyrin -le 'wɩ 'zʋ, ɛn "le 'pada 'le 'wɩ 'zʋ, ɛn "le -blɩfɛ -le 'wɩ 'zʋ, ɛn "le "lala -le 'wɩ 'zʋ. -A pɛɛnɔn zɩɛ, te 'ka -tʋ 'sia "fo "dɩ! Ɛn te 'ka 'tralɛ 'sia "fli "dɩ. 4'Kɔn nɛn 'ka wla 'ji 'nan o 'ka 'sia tɩglɩ bɛ, -a -ji nɛn 'ka 'fʋ, -e 'ka 'kʋdɩ 'e 'bɔ. 5-Te ka 'bɔla 'fla 'tʋ da, ɛn -a -nannɔn 'ka 'ka 'silɛa dɩɛ, ɛn wa'a "trɔɛn "tɔlɛ 'cɛɛ dɩɛ, 'ka 'si 'fla zɩɛ -a da. 'Pian "cɛɛ 'si 'fla 'bɔ da bɛ, 'ka 'cɛin -man fuɔn -koei "trɔa o da, -a -ci -kɔɔndɩ nɛn 'nan 'ka 'pɛ 'si -wee 'wɩ 'ji.»

6Zozi -srunɔn 'fuda "fli zɩɛ, o -kʋ. O ciɩ 'flanun da, te o Bali -le 'wɩ 'nɔnnɔn ve minnun lɛ, te o -cɛ "sia minnun man fɛ pɛɛnɔn 'nan.

Erodi ci 'kla "tra "dɩ

(Mt 14.1-2; Mk 6.14-16)

7Erodi nɛn e Galile 'lɛglɔn "paala bɛ, 'wɩ pɛɛnɔn nɛn Zozi cɩ -a drɛnan bɛ yaa 'man. Ɛn zɩ kɔ 'e ci "nrɔn bɛ, ya'a tɔa dɩ. Kɔɔ min -mienun -a ve 'nan: «Min -batize drɛzan Zan nɛn e -ka bɛ, -yɛɛ fuʋ.» 8Ɛn min plɔɛnnun -a ve 'nan: «Bali 'lewei vɩzan Eli nɛn 'li bɛ, -yɛɛ 'ta 'e 'fli -kɔɔnlɛ.» Ɛn min -mienun "o 'vɩ 'nan: «Bali 'lewei vɩnɔn nɛn 'li bɛ, -a -tʋ 'bɛ fuʋ.» 9'Pian Erodi "e 'vɩ 'nan: «'An 'bɔ 'gʋɛ, 'mɛn minnun 'bɛ Zan -wulo cɛɛn. Ɛn min nɛn an -yee 'wɩ maan 'gʋɛ, -tɩ 'bɛ "mɛn 'bɛ 'a?» -Yee "wɛan Erodi -a man -wɛɛdɩ 'sia 'nan 'e Zozi ye.

Zozi -blɩfɛ -nɔn min -kpi 'soolu lɛ

(Mt 14.13-21; Mk 6.30-44; Zan 6.1-14)

10Zozi 'le 'pasianɔn 'fuda "fli "bɛ o 'li 'o da. Ɛn 'wɩ pɛɛnɔn nɛn, waa drɛ bɛ, waa 'sinan 'pa Zozi lɛ.

"Bɛ -sru ɛn Zozi 'kʋ o 'saza 'a 'fla 'tʋ nɛn waa laabo Bɛzaida bɛ -a "srɔn. 11Min "kaga "o -kʋnan 'yɩ, ɛn o -kʋla Zozi -sru. Zozi 'ka o lilɛ 'o da dɩ. E Bali -le mingɔnnɛn -blɩdɩ 'wɩ 'vɩ -wlɛ, ɛn minnun nɛn -cɛ cɩ o man bɛ, e -cɛ 'si o man.

12Zɩ funninmlan "ta "paala bɛ, ɛn Zozi -srunɔn pli Zozi man. O 'nan -yrɛ 'nan: «'I vɩ minnun lɛ 'nan, 'o 'kʋ fei -paannun 'lee 'flanun nɛn -kogo 'gʋɛ -a da, -e 'o -blɩfɛ 'lee nyinnan "nan "yɩ. Kɔɔ fɛnan nɛn -kaa cɩ 'gʋɛ, min 'ka 'nyɛanla 'nan dɩ.»

13Ɛn Zozi "e -wlɛ 'nan: «'Ka 'bɔ, 'ka 'blɩfɛ -nɔn -wlɛ!»

Ɛn o 'nan -yrɛ 'nan: «'Kpɔun 'soolu 'lee pɔ "fli "nɛn 'kʋ 'lɔ "cɛ. I ya "vale 'nan, 'kʋ 'kʋ minnun "kaga 'labɛ o -blɩfɛ 'lɔ?» 14Minnun nɛn -nan bɛ, -klɔnmɔn a 'o va -kpi 'soolu.

Ɛn Zozi -a 'vɩ 'e -srunɔn lɛ 'nan: «'Ka o -nyran 'e cin da -fuba 'souzou.» 15Waa drɛla "da, ɛn o pɛɛnɔn 'nyran. 16Zozi 'kpɔun 'soolu 'lee pɔ "fli zɩɛ -a 'si, 'e yra -tɔ laji lou, ɛn e Bali muo "fɔ. E 'kpɔunnun "nɛn jɛɛn, ɛn yaa -nɔn 'e -srunɔn lɛ 'nan 'o -pli "minnun zɩɛ o man. 17O pɛɛnɔn -a blɩ, o 'kan. Ɛn -a -mie nɛn e -fʋ bɛ waa -tɛ 'e cin da, e saannɛn 'fa -fuda "fli.

Min nɛn Zozi cɩ -a bɛ Piɛri -a 'vɩ

(Mt 16.13-20; Mk 8.27-30)

18Yi -tʋ da Zozi a Bali trʋ 'banan 'e 'saza, te -a -srunɔn a -a "srɔn. Ɛn yaa laabʋ -wlɔ 'nan: «Minnun "o 'nan, -tɩ nɛn 'maan?»

19O -yrɛ 'nan: «Min plɔɛn "o 'vɩ 'nan, min -batize drɛzan Zan nɛn 'yia. Min -mienun "o 'vɩ 'nan, Bali 'lewei vɩzan Eli nɛn 'li bɛ, -nyrɛn 'yia. Ɛn o -mienun "o 'vɩ 'nan, Bali 'lewei vɩnɔn nɛn 'li bɛ, -a -tʋ 'bɛ fuʋ, -nyrɛn 'yia.»

20Ɛn Zozi -a laabʋ -wlɔ "nyian 'nan: «Kaa "nun, "ka 'vɩ 'nan, -tɩ nɛn 'maan?» Ɛn Piɛri "e -yrɛ 'nan: «I ya Crizi nɛn, Bali -a 'pa 'sia -e 'e minnun 'si 'wɩ 'ji bɛ -a.»

21Ɛn Zozi 'wɩ 'pla -wlɛ 'klagla 'nan, te 'o 'wɩ zɩɛ -a vɩ min -tʋ lɛ 'mlɔnmlɔn dɩ!

Zozi 'e 'kanan 'lee 'e wluandɩ -kanɔn 'va wɩ 'vɩ

(Mt 16.21-23; Mk 8.31-33)

22Zozi 'a 'pla "da "nyian -wlɛ 'nan: «E ya 'e vɩdɩ 'nan, Blamin -pɩ 'e yra ye "kaga. Ɛn "nyian bɛ, min cejenun 'lee Bali -pannɔn 'tanɔn 'lee 'fluba 'ci vɩnɔn -a dra 'o 'pɛla koda, ɛn o Blamin -pɩ -tɛa. -A yi yaagazan da -e 'e 'wluan -kanɔn 'va.»

Zozi -sru 'ta wʋdɩ

(Mt 16.24-28; Mk 8.34–9.1)

23"Bɛ -sru ɛn Zozi "e 'nan o pɛɛnɔn lɛ 'nan: «Min nɛn e ya "vale 'e dra 'an -sruzan 'a bɛ, 'e 'wɩ tʋ pɛɛnɔn man yra yɩdɩ man, ɛn 'e 'wɩ -kadɩ man yiba "plan da -e 'e -sɔɔnla 'an -sru. 24Kɔɔ min nɛn e cɩ 'e 'ladɩ 'yee 'trɛda da bɛ, -yee 'trɛda -taa 'silɛ -yrɔ. 'Pian min nɛn 'e 'pɛ 'si 'yee 'trɛda da "fo, ɛn yaa -nɔn 'mɛn bɛ, -a san 'bɛ 'belidɩ nɛn ya'a 'nyaan dɩɛ -a ye. 25-Te min 'trɛda fɛ pɛɛnɔn 'yɩ, ɛn 'belidɩ 'si -yrɔ "bɛ, -a -ci nɛn 'nɔn? -A -ci "ka "dɩ. 26Min nɛn, 'yra -a -tɛa -a vɩdɩ -a 'nan 'e ya 'an -sruzan 'a bɛ, ɛn -te 'bɛ "cɛɛ dɩ, 'mɛn 'wɩ vɩdɩ min pee lɛ yra -a -tɛa "bɛ, Blamin -pɩ -yee vɛ yra -tɛa "nyian tʋ nɛn e -taa "man "bɛ -a man. E -taa 'e 'bɔ 'le 'tɛ 'san 'lee 'e "tɩ "le 'tɛ 'san 'lee 'e "tɩ "le 'pasianɔn 'le 'tɛ 'san da. 27Maan ve 'cɛɛ 'wɩ tɩglɩ 'a 'nan, min -mienun a fɛ 'gʋɛ -a -nan bɛ, wa'a 'kaa 'vaa -e 'o -tɔ 'nan Bali mingɔnnɛn -blɩdɩ 'sia dɩ.»

Zozi -srunɔn yaaga Zozi 'yɩ 'yee 'tɛ 'san wlu

(Mt 17.1-9; Mk 9.2-10)

28Zozi 'wɩ zɩɛ -a 'vɩ, -a -nan yi 'sɔra "bɛ -sru, ɛn e Piɛri 'lee Zan 'lee Zaji 'sia, ɛn o -kʋ Bali trʋ 'balɛ pɔn -tʋ da. 29E ya Bali trʋ 'banan, ɛn -a yra liladɩ 'sia, ɛn -yee sɔ drɛ 'fuvu 'yrɩyrɩ. 30-A -nan nɛn 'o 'vale min "fli "a o -sɛɛ "wʋdɩ 'sia. Min "fli zɩɛ Moizi 'lee Eli nɛn waa. 31Bali -le 'tɛ 'san o si -fɔ, ɛn 'wɩ nɛn e "ta -daa "drɛlɛ Zozi lɛ Zeruzalɛm bɛ, waa -nan wɩ vɩdɩ 'sia -yrɛ.

32Tʋ zɩɛ -a wlu bɛ, te yi -fɔla Piɛri 'lee min "fli "nɛn o -kʋ waa bɛ, o da "fo. 'Pian o fuʋ ɛn o Zozi 'yɩ Bali -le 'tɛ 'san wlu. Ɛn o min "fli 'yɩ "nyian 'o 'tɔdɩ -a "srɔn. 33Minnun zɩɛ "wɛɛ 'si Zozi "srɔn "bɛ, ɛn Piɛri "e 'nan Zozi lɛ 'nan: «'An 'san, e drɛ 'wɩ "yi "a ɛn -kaa ta 'gʋ. Kʋ segle pannɛn yaaga -tɔa. -A -tʋ a 'yie vɛ -a, -a -tʋ a Moizi -le vɛ -a, ɛn -a -tʋ a Eli -le vɛ -a.» 'Wɩ nɛn Piɛri -a 'vɩ bɛ, yaa 'vɩ 'e lei -sru.

34Zɩ Piɛri a 'wɩ zɩɛ -a vɩnan bɛ, ɛn "lolu -koei "trɔa o da. "Lolu -koei "a -trɔanan Zozi -srunɔn da "fo. -A -nan nɛn nyɛn o cɛɛn. 35'Nun tɔɔn wei -tʋ wɩɩ "lolu -koei 'bɔ 'va. E 'nan: «'An 'pɩ nɛn, maan 'si "va "bɛ, -nyrɛn "bɛ. 'Ka "trɔɛn "tɔ -a wei lɛ!» 36Zɩ wei zɩɛ e wɩɩ bɛ, ɛn Zozi 'fʋ 'e 'tʋwli. 'Wɩ nɛn Zozi -srunɔn 'a -nan 'yɩ bɛ, wa'a -nan sɛɛ wʋlɛ min -tʋ lɛ "fo 'vaa ɛn Zozi 'kʋ laji dɩ.

Zozi -yʋ -wlidɩ "pin 'nɛn 'tʋ -sru

(Mt 17.14-21; Mk 9.14-27)

37Zɩ tʋ cɛɛn bɛ, ɛn o pɔn sɔɔn "ji. Min "kaga "ta Zozi 'silɛ -sia. 38Minnun 'bɔ zɩɛ o yei "bɛ, min -tʋ -paandɩ 'sia. Yaa 'vɩ 'nan: «Bali -le 'wɩ "paazan, mɛin trʋ "baa, 'i 'mɛn 'nɛn 'gʋɛ -a -nanjɛn! -Yɛɛ cɩ 'mɛn 'nɛn 'tʋwli "a. 39-Yʋ -wlidɩ "tʋ -taa "da, 'nun tɔɔn -e 'e -paandɩ 'sia. -Yʋ -wlidɩ 'bɔ -a "cɛan "da, te yaa 'le -pɔɛ bɔa. "Yɛɛ vɩnan 'e 'si "da "bɛ, te e 'tɛ 'pa "da "kaga. 40Mɛin -srunɔn trʋ 'ba 'nan, 'o 'yʋ -wlidɩ zɩɛ -a -pin -a -sru. 'Pian wa'a -kɔlalɛ -a dɩ.»

41Ɛn Zozi "e 'nan: «-Naagʋnɔn, 'cee yi -tɛradɩ Bali da "ka "dɩ. 'Ka 'wɩ 'wlidɩ "dra. Tʋ wɛa nɛn "nyian maan dra 'ka 'va? 'An "koe -nyaan 'ka man 'e "tun. 'I 'ta 'yie 'nɛn 'a 'gʋ!»

42Zɩ 'nɛn 'bɔ "ɛ -pli Zozi man bɛ, ɛn -yʋ -wlidɩ -a -tria "tra. Yaa cɛɛn "da. 'Pian Zozi 'e yra 'tɔn 'tɔ -yʋ -wlidɩ "da, ɛn e 'nan -yrɛ 'nan: «'I 'si 'nɛn 'gʋɛ -a -sru.» Zɩ Zozi -a beli bɛ, ɛn e 'nan -a "tɩ "lɛ 'nan: «'Yie 'nɛn nɛn 'gʋ.» 43Bali -le -dan 'lee -yee 'plɛblɛ min pɛɛnɔn 'kan.

Zozi 'e 'kanan 'lee 'e wluandɩ -kanɔn 'va wɩ 'vɩ "nyian

(Mt 17.22-23; Mk 9.30-32)

'Wɩ nɛn Zozi -a drɛ bɛ, min pɛɛnɔn 'plo 'fʋ 'e 'fɔdɩ. -A -nan nɛn Zozi 'a 'vɩ 'e -srunɔn lɛ 'nan: 44«'Ka "trɔɛn "tɔ 'wɩ 'gʋɛ -yrɛ 'kpa tɩglɩ! Minnun "ta -daa Blamin -pɩ -nɔnlɛ minnun lɛ -e 'o -tɛ.» 45-A -srunɔn 'ka 'wɩ zɩɛ -a -ci manlɛ dɩ. -A -ci a 'e yɔɔdɩ -wlɔ, 'dʋ -e 'o vɩlɛ 'o -ci man dɩ. 'Pian -a -ci laabʋdɩ "klan o -tɛ.

-Tɩɛ cɩ Zozi -sruzan -dan a?

(Mt 18.1-5; Mk 9.33-37)

46"Bɛ -sru -sa -tʋ -tria Zozi -srunɔn yei. -Sa zɩɛ -nyrɛn 'nan, -tɩɛ cɩ o yei Zozi -sruzan -dan a? 47Zozi 'a -kɔnnɛn 'yɩ -wlɔ. -A -nan nɛn e 'nɛn "wɛnnɛn 'tʋ 'si, yaa -tɔ 'e "srɔn, 48ɛn e 'nan -wlɛ 'nan: «Min nɛn e 'nɛn "wɛnnɛn 'gʋ -a 'kun tɩglɩ 'mɛn "wɛan bɛ, te 'an 'bɔ nɛn yaan 'kun tɩglɩ. Ɛn min nɛn yaan 'kun tɩglɩ bɛ, te min nɛn yaan 'pa 'sia 'trɛda bɛ, -a 'bɔ nɛn yaa 'kun tɩglɩ. Maan ve 'cɛɛ 'nan, 'an -sruzan nɛn 'e 'fli drɛ 'nɛn "wɛnnɛn 'a bɛ, -a san 'bɛ cɩ -dan.»

Min -tʋ -yʋ -wlidɩ "pin minnun -sru

(Mk 9.38-40)

49Ɛn Zan "e 'nan Zozi lɛ 'nan: «Bali -le 'wɩ "paazan, kʋ min -tʋ 'yɩ, te e -yʋ -wlidɩ -pian "minnun -sru 'i 'tɔ da. Ɛn kʋa 'vɩ -yrɛ 'nan, te 'e drɛ dɩ, kɔɔ ya'a 'ta 'wʋla 'i -sru "le 'kʋe 'wɩ 'zʋ dɩ.»

50Ɛn Zozi "e 'nan -yrɛ 'nan: «Te 'ka 'wɩ zɩɛ -a drɛ dɩ! Kɔɔ min nɛn, -a pei 'ka 'e 'padɩ 'ka man dɩɛ, te e ya 'ka 'va.»

Zozi Zeruzalɛm si 'sia

51Tʋ nɛn Bali Zozi "sia 'trɛ 'gʋɛ -a da -e 'e 'kʋ -a laji bɛ, e 'bɔ 'kogo. -A -nan nɛn Zozi 'nyinnan 'e 'fli da, ɛn e Zeruzalɛm si 'sia. 52E minnun 'pa 'sia 'e 'lɛ. Minnun zɩɛ o -kʋ, ɛn o 'bɔla Samari 'nɔn fla. O nyinnan "nan -wɛɛdɩ 'sia Zozi lɛ 'fla zɩɛ -a da. 53'Pian Samari 'nɔn 'ka 'wɩlɛ "man "fo "dɩ, kɔɔ Zeruzalɛm nɛn e "ta -ko.

54Zɩ Zozi -srunɔn Zaji 'lee Zan 'wɩ zɩɛ -a 'man bɛ, ɛn waa 'vɩ Zozi lɛ 'nan: «Minsan, i ya "vale 'kʋ 'tɛ 'si laji -e 'e o -nan -nyan?» 55Zozi 'e man lila o da, ɛn e 'wɩ 'pla -wlɛ 'klagla. [Yaa 'vɩ -wlɛ 'nan: «Min nɛn ka drɛ -yee 'nɛnnun -a bɛ -a -cin 'san 'ka 'ji 'va? 56Kɔɔ 'an 'bɔ Blamin -pɩ ma'an 'talɛ 'trɛda 'nan -e 'an minnun -tɛɛ "dɩ. 'Pian an -ta 'nan -e 'an minnun 'si 'wɩ 'ji.»] -A -nan nɛn o 'fla pee da si 'sia.

Zozi -sru 'ta wʋdɩ

(Mt 8.19-22)

57Zɩ o ya -kʋnan -sia bɛ, ɛn min -tʋ "e 'nan Zozi lɛ 'nan: «Fɛnan pɛɛnɔn nɛn i -ko bɛ, kʋɛ 'ko 'yia.»

58Ɛn Zozi "e 'nan -yrɛ 'nan: «-Canjannɛnnun nyinnan a, ɛn "lomannun "kɔɛ "a, 'pian Blamin -pɩ "le "fɛ -tʋ -nan "ka -e 'e 'wulo 'pla 'nan dɩ.»

59Ɛn Zozi 'a 'vɩ min -tʋ lɛ 'nan: «'I -sɔɔnla 'an -sru!»

Min zɩɛ e 'nan Zozi lɛ 'nan: «Minsan, 'i 'si -nɔn 'mɛn, -e 'an 'kʋ 'an "tɩ "wʋ 'vaadrɔ.»

60Zozi "e 'nan -yrɛ 'nan: «Minnun nɛn Bali "le 'va o cɩ 'o 'kadɩ bɛ, 'i o 'tʋɩ 'o 'wee min wʋ. 'Pian 'i 'bɔ 'i 'kʋ -a vɩ minnun lɛ 'nan Bali -le mingɔnnɛn -blɩdɩ 'bɔ.»

61Ɛn min pee -a 'vɩ 'nan: «Minsan, an -taa -sɔɔnlɛa 'i -sru, 'pian an ya "vale 'i 'si -nɔn 'mɛn -e 'an 'kʋ -si trʋ 'ba 'an 'mangulinun lɔ.»

62Ɛn Zozi "e 'nan -yrɛ 'nan: «-Te min -si -tʋ 'sia, te -a "trɔɛn "a 'e koda bɛ, -a san zɩɛ ya'a dra Bali -le mingɔnnɛn trɛdavɛ -a "fo "dɩ.»