Search form

Matie 20

'Nyranman 'panɔn 'man -kɔnnɛn

1Zɩ Zozi 'wɩ zɩɛ -a 'vɩ bɛ, ɛn e -kɔnnɛn "tʋ -fɔ -wlɛ. Yaa 'vɩ -wlɛ 'nan: «Bali -le mingɔnnɛn -blɩdɩ min da bɛ, -nyrɛn 'gʋ, e ya "le fei san -tʋ 'bɛ 'bɔla bodrun puunɔn ɛn e minnun -wɛɛdɩ 'sia 'nan -e 'o 'kʋ 'nyranman 'pa 'yee rɛzɛn fei. 2E min -mienun 'yɩ, ɛn o wei drɛ waa -tʋ 'nan yi -tʋ nyranman -pan nɛn 'e -nɔan -wlɛ. Ɛn o -kʋ 'yee fei zɩɛ -a da.

3E 'bɔla "nyian te bodrun yidɛ wluan loulou 'kpa. Ɛn e min -mienun 'yɩ 'o -nyrandɩ -guada, te 'nyranman 'ka -wlɔ -e 'o 'pa dɩ. 4Ɛn "e 'nan -wlɛ 'nan: ‹'Ka 'kʋ 'nyranman 'pa 'mɛn fei! Maan man -ko "paa 'cɛɛ.› 5-A -nan nɛn minnun zɩɛ o -kʋ -yee rɛzɛn fei.

Fei san zɩɛ e 'bɔla "nyian te yidɛ 'bɔ min -win -ji 'sɛzɛ, ɛn e 'bɔla "nyian te funninmlan yidɛ tɛɛnla. Minnun nɛn e 'bɔ o man bɛ, 'wɩ 'tʋwli zɩɛ -nyrɛn yaa 'vɩ -wlɛ. 6Zɩ yidɛ 'pla plɔ da bɛ, ɛn e 'bɔla "nyian, e 'bɔ min -mienun man -guada, ɛn yaa laabʋ -wlɔ 'nan: ‹-Mɛ "le "wɛan nɛn ka -fʋ 'ka -nyrandɩ bodrun 'trilii funninmlan, ɛn ka'a 'nyranman 'tʋ 'palɛ dɩ?›

7O 'nan -yrɛ 'nan: ‹Min -tʋ 'ka 'kʋ 'silɛ 'nan 'kʋ 'yee 'nyranman 'pa dɩ.›

Ɛn fei san "e 'nan -wlɛ 'nan: ‹'Ka 'kʋ 'nyranman 'pa 'mɛn rɛzɛn fei!›

8Zɩ funninmlan 'pla bɛ, ɛn fei san zɩɛ e min nɛn e yiɛ -tɔa 'yee 'nyranman 'panɔn 'va bɛ -a laabʋ. E 'nan -yrɛ 'nan: ‹'I 'nyranman 'panɔn pɛɛnɔn laabʋ -e 'i o -ko 'pa. 'I 'sia minnun nɛn o -fɔla "da "bɛ o da -e 'i 'le 'sran minnun nɛn o -trɔa -si 'lɛ bɛ o da.›

9-A -nan nɛn minnun nɛn o -kʋ 'nyranman 'palɛ te yidɛ 'pla plɔ da bɛ o -ta, ɛn e yi -tʋ nyranman man "lala -nɔn o pɛɛnɔn lɛ. 10Yaa drɛ zɩɛ -trilii ɛn e 'bɔ minnun nɛn o -trɔa -si 'lɛ bɛ o da. -A -cin a o ji 'nan 'o -kopa -taa 'ciɩlɛa "da, 'pian yi -tʋ nyranman man "lala nɛn waa 'yɩ 'o pɛɛnɔn.

11-A -nan nɛn o 'wɩ 'blɩdɩ 'sia fei san va. 12Waa 'vɩ -yrɛ 'nan: ‹Minnun nɛn o -ta 'e -fɔla "da 'gʋɛ, wa'a 'mɔnlɛ 'nyranman 'panan "fo "dɩ. 'Kʋ 'bɔ nɛn kʋ 'nyranman 'pa yi -tʋ "fo, ɛn kʋ -fʋ yidɛa "trilii bɛ, i 'kʋ 'pan 'bɔ waa 'e cin man. -Mɛ "le "wɛan yaa drɛ zɩ?›

13Ɛn fei san 'wɩ 'si "va o va min -tʋ lɛ. Yaa 'vɩ -yrɛ 'nan: ‹'An bee! Ma'an 'wɩ 'wlidɩ "drɛlɛ 'yiɛ dɩ. Yi -tʋ nyranman "lala da nɛn 'kʋ wei -tria, -njɛɛ dʋʋ? 14-Yɛɛ cɩ 'yie vɛ -a, 'i 'si -e 'i 'kʋ. Min nɛn e -fɔla "da "bɛ, -te maan -ko "paa "le 'yie 'wɩ 'zʋ oo, e "siala 'an 'bɔ 'a. 15'Wɩ nɛn e 'sɔ 'an 'ji bɛ, -a 'bɔ nɛn maan dra 'an yɩfɛ -a. -Te an "yi drɛ min lɛ bɛ, -mɛ drɛ -a 'wɩ "naan 'i man?› »

16Ɛn Zozi 'a 'le 'sran -wlɛ 'nan: «Minnun nɛn o -fɔla "da "bɛ, zɩ o -taa "drɛlɛ -si 'lɛnɔn 'a zɩɛ, ɛn minnun nɛn o -trɔa -si 'lɛ bɛ, zɩ o -taa "fɔlɛa "da zɩɛ.»

Zozi 'e 'kanan 'lee 'e wluandɩ -kanɔn 'va wɩ 'pa yaagazan 'vɩ

(Mk 10.32-34; Lk 18.31-34)

17Zozi 'lee 'e -srunɔn a -kʋnan Zeruzalɛm. -A -nan nɛn Zozi 'e -srunɔn 'fuda "fli laabʋ 'o 'saza, ɛn e 'nan -wlɛ 'nan: 18«-Kaa "ta -ko Zeruzalɛm 'gʋɛ, minnun 'an 'bɔ Blamin -pɩ -nɔan Bali -pannɔn 'tanɔn 'lee 'fluba 'ci vɩnɔn lɛ. O tin -tɛa 'an da -e 'an 'ka -a 'wɩ 'ji. 19Waan -nɔan "minnun nɛn o 'ka Zuif 'nɔn 'a dɩɛ -wlɛ. Minnun zɩɛ waan sɛɛ wo, waan -sɔan -ngble -a, ɛn waan -pɛinman yiba "plan da -e 'an 'ka. 'Pian -a yi yaagazan da bɛ, -e 'an 'wluan -kanɔn 'va.»

Zaji 'lee 'e "bʋɩ Zan bɛ, o "bʋ "fɛ -tʋ -si laabʋ Zozi 'lɔ

(Mk 10.35-45; Lk 22.24-27)

20"Bɛ -sru ɛn Zebede nan pli Zozi man 'o 'vale -yee 'nɛnnun -a. E "po sɔɔn Zozi 'wlu 'nan -e 'e 'wɩ 'tʋ -si laabʋ -yrɔ.

21Ɛn Zozi 'a laabʋ -yrɔ 'nan: «-Mɛ 'va nɛn i cɩ?»

Lɩ zɩɛ e 'nan Zozi lɛ 'nan: «'Mɛn 'nɛnnun "fli 'gʋɛ, tʋ nɛn i dra mingɔnnɛn -a bɛ, 'i 'wɩ "man -e 'o -nyran 'i "srɔn. -A -tʋ 'e -nyran 'i 'pɛ "yi "da, -e -a -tʋ 'e -nyran 'i 'pɛ bʋ da.»

22Ɛn Zozi "e 'nan -wlɛ 'nan: «'Wɩ nɛn ka cɩ -a laabʋnan bɛ, ka'a 'ci tɔa dɩ. 'Wɩ yɩdɩ nɛn e "ta -daa "bɔlɛ 'an man bɛ, 'ka 'wulo "sɔa "wlu?»

Ɛn -yee 'nɛnnun 'bɔ -a 'vɩ -yrɛ 'nan: «-Inyan, 'kʋ 'wulo "sɔa "wlu.»

23Zozi "e 'nan -wlɛ 'nan: «'Wɩ 'kpa nɛn, 'wɩ nɛn e "ta -daa "bɔlɛ 'an man 'gʋɛ e bɔa "nyian "cee "man. 'Pian -nyrandɩ 'an 'pɛ "yi 'lee 'an 'pɛ bʋ da bɛ, 'an 'bɔ "cɛɛ -si -nɔan "min lɛ dɩ. Minnun nɛn 'an "tɩ -a pla o 'tɔ man bɛ -wee vɛ 'bɛ cɩ -a.»

24Zozi -srunɔn 'fu nɛn o -fʋ bɛ, zɩ o 'wɩ zɩɛ -a 'man bɛ, ɛn 'bli 'fɔ o ji Zan 'lee 'e "bʋɩ Zaji man. 25-A -nan nɛn Zozi o pɛɛnɔn laabʋ, ɛn e 'nan -wlɛ 'nan: «Kaa -tɔa 'nan, 'trɛda mingɔnnɛnnun min "paala -sa wɩ -a. Ɛn minnun nɛn o cɩ min -dandannun -a bɛ, o -va -ble minnun da. 26'Pian te 'wɩ zɩɛ -nyrɛn 'e 'kɔn 'ka yei "dɩ. Min oo min nɛn e ya "vale 'e dra min -dan a 'ka yei "bɛ, 'e 'fli 'pla 'ka pɛɛnɔn 'wlu o 'sudɩ -a! 27Ɛn min oo min nɛn e ya "vale 'e dra 'ka 'tazan -a bɛ, 'e 'fli drɛ 'ka pɛɛnɔn 'le nɔan -a! 28'Wɩ 'tʋwli zɩɛ -a 'bɔ nɛn an 'bɔ Blamin -pɩ maan drɛ. Ma'an 'talɛ 'nan -e minnun 'waan 'su dɩ, 'pian an -ta 'nan -e 'an minnun 'su. Ɛn an -ta 'nan -e 'an 'ka -e min "kaga 'o 'sʋ Satan -le 'plɛblɛ 'lɔ.»

Zozi yiɛ 'winɔn "fli yiɛ 'lɛ 'sʋ

(Mk 10.46-52; Lk 18.35-43)

29Zɩ Zozi 'lee 'e -srunɔn 'si Zeriko bɛ, min "kaga 'kpa sɔɔnla o -sru. 30Yiɛ 'winɔn "fli "a 'o -nyrandɩ -si man, waa 'man 'nan Zozi a ciɩnan, ɛn o -paandɩ 'sia. O paan 'nan: «Minsan, David kluda min, 'kʋ nyrinda 'e 'sɛn 'i da!»

31Ɛn minnun paan o da 'nan 'o 'lɛbo 'pla da. 'Pian yiɛ 'winɔn zɩɛ o paan "nyian 'plɛblɛ 'kpa. O paan 'nan: «Minsan, David kluda min, 'kʋ nyrinda 'e 'sɛn 'i da!»

32Zozi 'tɔ, e o laabʋ, ɛn e 'nan -wlɛ 'nan: «Ka ya "vale 'an drɛ 'cɛɛ 'kɔ?»

33O 'nan -yrɛ 'nan: «Minsan, kʋ ya "vale 'i 'kʋ yiɛ 'lɛ 'sʋ!»

34O nyrinda -sɛn Zozi da, -a -nan nɛn 'e 'pɛ klɛ o yiɛ man, 'nun tɔɔn o yiɛ 'lɛ 'sʋ, ɛn o sɔɔnla -a -sru.