Search form

SALMOS 132

1X̱ana' Dios, bejsá' ḻaže' kan gok che Dabí, na' kan wẕáka'ḻi'e,

2na' kan nak da' bchebe ḻaže'e gone' chio',

dan' bchebe ḻaže'e ḻawo' Le', Dios waḻe che Jakob.

3Wnné': “Batkle choa'a liža',

na' batkle gata'a ḻo da' žáte'la',

4na' batkle wsejwa' yej ḻawa',

na' batkle tasa',

5na' zejte ba bena' to latje gan ga'n X̱ana' Dios,

gan soakze Dios waḻe che Jakob.”

6Benlto' kak la'y gan yo'o diža' da' bénḻeno' x̱a gole wdé cheto' ka' wzóa ḻo yežlyó Efrata,

na' bežéḻ-lton' ḻo yežlyó che bennen' le' Jaar.

7Wnnato': “Le cho'o gan zoa Dios chežo,

na' wzóa ẕibžo ḻawe' Ḻe'.”

8Wzó ža', X̱anto' Dios,

ḻen kak la'y che yeḻa' wak chio',

na' da ḻaw ya'a gan soakzo' Le'.

9Ben ga gongak bx̱oz chio' ka' da' naken chawe',

na' kwéžeya'a yógo'te benách chio' ka' ḻo yeḻa' žebele chégake'.

10Dan' nži'ilo' Dabí, wen žin chio',

bi wzó' cheḻa'ale benne' wnná bian' wžío' Le'.

11Da' likze bzetj kwin X̱anžo Dios,

na' bchebe ḻaže'e bi da' gone' che Dabí,

na' bi wnite' dan' wnné' gone'.

Wnné': “Gona' ga nna bia'gak ẕa'só' ka' gan ẕnna bia'kzo' le'.

12Cha' góntezegak ẕi'no' ka' ka nak x̱tiža'a dan' bénḻena' le',

na' ka nak x̱tiža'a dan' wsedla' le',

na' ẕi'no' ka' nna biá'tezegake' gan ẕnna bi'o le'.”

13Dan' wžé X̱anžo Dios yež Sión gok ḻaže'e soa ližkze' ga na',

14na' wnné': “Gákteze latje nga gan soakza' neda'.

Sóateza' nga dan' ki žaz ḻaža'a gona'.

15Gona' gáta'ḻe'e linne chegak benne' ka'.

Gona' ga yéljgekle benne' yache' ka' yet.

16Gona' ga gongak bx̱oz chia' ka' da' naken chawe'.

Kwéžeya'a yógo'te benách chia' ka' ḻo yeḻa' žebele.

17Ḻo latjen' gona' ga yeyák yeḻa' wnná bia' che Dabí.

Gona' ga soagak nbangak ẕa'só benne' wnná bian' ga na', bennen' wžía' neda'.

18Gona' ga chíx̱gekle benne' ka' bi ẕḻé'egekle' ḻégake' chawe',

san gona' ga diá'teze yeḻa' wnná bia' che Dabín'.”

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index