Search form

SALMOS 22

1Dios chia', Dios chia', ¿biẕ chen' wléj yichjo' neda'?

¿Biẕ chen' bi ženlo' kate' ẕnnabla' Le' yesló' neda'?

2Dios chia', žḻiža' Le' tža tža, san bi žechebo' chia'.

Žḻiža' Le' žel, na' bi žezí' ḻaža'a,

3san Le' nako' la'y.

Ẕbezkzo' gan ẕka'n ẕengak benne' Israel ka' Le'.

4X̱a x̱na' wdé cheto' ka' bx̱en ḻáže'gake' Le'.

Bx̱en ḻáže'gake', na' besló' ḻégake'.

5Bḻížgake' Le', na' gókḻeno' ḻégake'.

Bx̱en ḻáže'gake' Le', na' bi bedoé'egekle',

6san neda' naka' ka to bel góna'do', na' kege benne'.

Ẕža'agak benne' ka' neda' na' žon dítjgekle' neda'.

7Yógo'te benne' ka', kate' ẕḻé'egekle' neda', ẕká'ngake' neda' ka'ze.

Žsáljwgake' žóa'agake' nich nnégake' chia',

na' ẕta yíchjgake', na' ẕnnágake':

8“Bx̱en ḻaže'e X̱anžon' nich yeslé' ḻe'.

Yeslé' ḻe' cha' žaz ḻaže'e ḻe'.”

9San Le', X̱ana', bex̱o' neda' kate' golja'.

Beno' ga bx̱en ḻaža'a Le' kate' ne žaẕa'a.

10Wyoá'a ḻo no'o kate' bi na' galja'.

Kate' ne yoa'a ḻe'e x̱na'a, báchekze nako' Dios chia'.

11Bi yebigo'o gan zoa' dan' zoa gawze da' wsakan' neda',

na' bi zoa no benne' gákḻene' neda'.

12Benne' ka' bi ẕḻé'egekle' neda' chawe' zej nyechjle' neda', benne' ka' zej nake' ka bež ka'.

Zej nyechjle benne' ka' neda', benne' ka' zej nake' ka bež waḻe ka' che yežlyó Basán.

13Gónegekle' wžía yí'gake' neda'

ka žon to bež yix̱e', bia ẕdonba', na' ẕbéžeya'aba'.

14Bedó ḻaža'a, na' gok ḻáẕda'wa' ka nis da' nlaljen,

na' yógo'te žit yoa'a bsángaken ljéžgaken ka'.

Ḻáẕda'wa' goken ka china' bez, da' beyonan ḻi'a ka nis.

15Beyák yeḻa' waḻe chia' ka to že'n yo dan' nla'an, na' loža'a wdán' chichjla'.

Bletjo' neda' ḻo bix̱te yo che yeḻa' got.

16Zej nyechjle benne' wen da' ẕinnj ka' neda'.

Zej nyechjle' neda' ka beko' ka'.

Wdídjwgake' ni'a na'a.

17Wak wlaba' yógo'te žit yoa'a,

na' benne' ka' ẕḻé'egeklen', ẕwíazegake' neda'.

18Bdísgake' ẕa' che chégake',

na' ḻawle ẕan' wléjgake' da' gak bian'.

19San Le', X̱ana' Dios, bi bkwaso' gan zoa'.

Nakkzo' Le' yeḻa' waḻe chia', na' gákḻeno' neda'.

20Beslá be' da' nakkza' ḻo na' benne' wdíe' neda' ya ntoche'.

Bennen' žénele' wžía yi'e neda' žone' ka žon to beko'.

21Beslá neda' ḻo žoa'a bež yix̱e'.

Beslá neda' ḻo lozgak bež waḻe ka'.

22Wzenla' bi' ljéža'do' ka' kan nako' Le'.

Wká'n ẕenkza' Le' gachje ḻawle benne' ka' zej ndobe' chio' Le'.

23Ḻe'e, benne' ka' ẕžébele X̱anžon':

¡Le wká'n ẕene' Ḻe'!

¡Le wká'n ẕene', ḻe'e, ẕa'só Jakob!

¡Le žebe Ḻe', ḻe'e, ẕa'só Israel ka'!

24Bi ẕnnita' Dios benne' yache' ka' cheḻa'ale,

na' bi ẕdeze' da' ẕzáka'gake',

na' bi ẕkache' ḻawe' ḻawgak benne' ka',

san kate' žḻížgake' Ḻe', ženle' chí'igake'.

25Gachje ḻawle benne' zan ka', benne' zej ndobe' chio'

wká'n ẕenkza' La la'y chio' Le',

dan' bchebe ḻaža'a gonan' ḻawgak benne' ka' ẕžébegake' Le'.

26Gawgak benne' gax̱jw ka', na' yéljgekle'.

Bíga'gake' ḻaw X̱anžon', na' wká'n ẕéngake' Ḻe'.

Gákteze yeḻa' ba nez ẕen chegak benne' ka'.

27Benne' ka' nníta'gake' dot yežlyó chejsá' ḻáže'gake' X̱anžon', na' yežíngake' ḻawe' Ḻe'.

Yógo'te kwe' benách ka' wká'n ẕéngake' Ḻe',

28dan' napkze X̱anžon' yeḻa' wnná bia',

na' nna bi'e yógo'te yež ka'.

29Gawgak yógo'te benne' ẕen ka' che yežlyó nga, na' wká'n ẕéngake' Dios.

Wzóa ẕibgak yógo'te benne' ka' ḻawe' Ḻe'.

Benne' ka' bi gak yeslá kwíngake' nich bi gátgake'.

30Ẕa'sógak benne' ka' góngakbe' žin che X̱anžon'.

Wzéngekle' ẕí'ngake' ka' ka nak chie'

na' zejte chejsete chegak benne' ka'.

31Yežíngake', na' wzéngekle' benne' ka' ka nak da' chawe' da' žon Dios.

Wzéngekle' benne' ka' bi na' gáljgake' ben Dios da' ki.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index