Search form

SALMOS 27

1X̱anžo Dios nake' yeḻa' baní' chia', na' Benne' žeslé' neda'.

Bi gak no benne' wchebe' neda'.

X̱anžo Dios nake' Benne' žape chi'e neda'.

Bi gak no benne' wzóe' neda' ḻo da' zedḻe'e.

2Kate' benne' ka' bi zej nake' chawe' byéchjgekle' neda',

ḻen benne' ka' žsáka'gake' neda', na' bi ẕḻé'egekle' neda' chawe',

nich wžía yí'gake' neda',

na' bejchégwgake', na' bedoé'egekle'.

3Ḻa'kze chéchjgekle benne' zan, benne' žjake' ḻo wdiḻe neda',

benne' ka' bi ẕḻé'egekle' neda' chawe', bi žébekza'.

Ḻa'kze žon byéngake' tíḻ-ḻena' ḻégake',

neda' wx̱én ḻáže'kza' Dios.

4To da' ẕnnabla' X̱anžo Dios.

Toze da' ẕdan ḻaža'a, dan' naken soa' liž X̱anžon' yógo'te ža soa' nbana',

nich wláb ḻaža'a ka nak yeḻa' ẕen che X̱anžon',

na' wcháḻjḻena' Ḻe' ḻo yodo' la'y chie'.

5Ḻe' wkache' chawe'e neda' ḻo latje la'y chie' kate' žin ža gak da' bi nak chawe'.

Wkache' chawe'e neda' ḻo latjen' gan zoakze' Ḻe'.

Wzóe' neda' to gan soa' chawe'.

6Naž gone' ga wzex̱jwa' benne' ka' bi ẕḻé'egekle' neda' chawe', benne' ka' zej nyechjle' neda'.

Ḻo yeḻa' žebele gota' biado' ka' ḻo bkog la'y chie'.

Goḻkza', na' wká'n ẕenkza' X̱anžon'.

7X̱ana' Dios, benle chi'a kate' žḻiža' Le'.

Beyache' ḻaže'l neda', na' bechebe chia'.

8Ḻo yichj ḻáẕda'wa' benla' chi'o, na' wnnó':

“Da ga zoa' ni.”

Yida' gan zo' Le', X̱ana' Dios.

9Bi wkache' ḻawo' Le' ḻawa' neda'.

Ḻo yeḻa' ẕža'a chio' bi yebigo'o gan zoa' neda', wen žin chio'.

Toze Le' žákḻeno' neda'.

Bi wsano' neda', na' bi kwej yichjo' neda', Dios, weslá chia'.

10Ḻa'kze wsangak x̱a x̱na'a neda',

yeka'akze X̱anžo Dios neda'.

11Bsedle neda' da' žak ḻažo'o gona', X̱ana' Dios,

na' bḻoe'el neda' da' naken ḻi ḻaže' da' žaḻa' gona',

dan' zej nyan benne' ka' bi ẕḻé'egekle' neda' chawe'.

12Bi go'o latje benne' ka' wžía yí'gake' neda'.

Zej nyechjle benne' wen ḻaže' ka' neda', na' žesbága'gake' neda' ẕia.

13X̱anžo Dios bchebe ḻaže'e ḻe'ela' da' chawe' chie' gan sóateza' nbana'.

Chela' bi žejḻi'a da' ni, na' gat ni'a na'a.

14Le kwez ža yeḻá' X̱anžon'.

Le gon choch ḻáže'le, na' Ḻe' wzé choche' ḻe'e.

O', le kwez ža yeḻá' X̱anžon'.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index