Search form

SALMOS 45

1Yo'o yichj ḻáẕda'wa' diža' x̱tanḻe'e ka',

na' goḻkza' ka nak che benne' wnná bia'.

Goḻkza' da' bzoj to benne' ẕcháḻjḻi'e chawe'.

2Nako' le' x̱tánle'eže ka yógo'te benne' ka'.

Nak cheto' yeḻa' ba nez ni'a che da' ẕchaḻjo',

dan' Dios ben cháwe'kze' le' to chi'ize.

3Bda' ya ntoche' chio' žoa'a ḻi'o, le', benne' waḻe,

ḻo yeḻa' ẕen chio', na' ḻo yeḻa' wnná bia' chio'.

4Ḻo yeḻa' ẕen chio' zo' nbankzo'.

Bkonle žin diža' li, na' yeḻa' gax̱jw ḻaže',

na' da' chawe', na' wzejní'il kwino' da' ẕenḻe'e ka'.

5Zej nḻáḻe'egak yag ntóche'do' chio' ka',

da' ka' gótgaken benne' yež ka' ḻawo' le',

na' cházgaken ḻáẕdo'gak benne' ka' ẕžá'agake' le'.

6Gan ži'o, Dios, žen' to chi'ize, na' sóatezen.

Chawe' nak ka ẕnna bi'o.

7Nži'ilo' da' nak chawe',

na' bi ẕḻe'elo' chawe' da' bi nak chawe'.

Che ḻen Dios chio' bzoe' le' latje chio', gan žebéḻe'eželo' ka lježo' ka'.

8Ẕḻa' ẕix̱ ẕa lano' ḻen da' ka' zej naken mirra, na' áloe, na' kasia, da' ka' ẕḻá'gaken ẕix̱.

Ḻo ližo' da' záka'ḻe'en ẕzóagake' le' ḻo yeḻa' ba nez.

9Bi' no'le chegak benne' wnná bia' ka' zej zoabe' ladjw ẕo'lo' ka', no'le ka' zej nakže' blo.

Kwito' ḻi ža že' bi' no'len' gakbe' ẕo'lo', bi' no'len' si'be' oro da' zan' zaka' yež Ofir.

10Bze nag, nó'ledo', na' bwia nga, na' benle da' nnia'.

Žaḻa' gaḻ ḻažo'o lažo', na' liž x̱o',

11na' benne' wnná bian' dan ḻaže'e yeḻa' x̱tan chio'.

Gok gax̱jw ḻaže' ḻawe' ḻe' dan' nake' ḻe' x̱ano',

12na' ḻa'gak no'le yež Tiro ka' ḻawo' le', zej noe'e da' gónngake' chio'.

Nnabgak benne' wnni'a ka' to da' gono' chégake'.

13X̱tanle'e nak bi' no'le che benne' wnná bian' ḻo yo'o gan zoe'.

Ẕa lánabe' nzin' da' x̱tan ka' da' zej naken oro.

14Wché'gake'-be' ḻaw benne' wnná bian',

nákwbe' ẕa lánabe' dan' nwa'ḻe'en da' x̱tan ka'.

X̱kwide' nó'ledo' ka' chjakbe' x̱kóže'lbe'.

Nó'ledo' ki, no'le lježbe' ka', wché'gakbe' ḻebe' ḻaw benne' wnná bian'.

15Ḻo yeḻa' žebele, na' ḻo yeḻa' ba nez wché'gakbe' ḻebe',

na' chó'ogakbe' ližo', benne' wnná bia'.

16Ḻo latje chegak x̱a x̱to'o ka' soagak ẕi'no' ka'.

Gono' ga nna bia'gak x̱kwide' chio' ka' do ẕente yežlyó.

17Gona' ga chejsá' ḻáže'gak yógo'te benne' ka' lo'.

Che ḻen wká'n ẕengak benne' ka' le' yógo'te yiz so', na' to chi'ize.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index