Search form

SALMOS 46

1Dios ẕḻe'ekzle' žo'o, na' žone' žo'o benne' waḻe ka'.

Zóateze' gákḻene' žo'o kate' ẕzáka'žo.

2Che ḻen, bi žébežo ḻa'kze x̱o' yežlyó nga,

na' chejchazgak ya'a ka' ḻo nisdo',

3na' ḻa'kze chasḻe'e nisdon', na' gonḻe'en žax̱to',

na' ẕízegak ya'a ka' ni'a che da' žẕo'.

4De to yegw da' ẕnnen ḻo yeḻa' žebele ḻo yež che Dios,

na' ḻo liž Dios, Bennen' nape' dot yeḻa' ẕen.

5Dios zoe' yežen', na' batkle kwia yin'.

Yide' zildo' na' gákḻene' benne' wláž ka' che yežen'.

6Ẕbéžeya'agak benne' yežlyó nga, na' ẕžébegake' Dios, Benne' Wnná Bia' Ẕen.

Ẕnne Dios kan ẕnne wzió', na' ẕbia yi' yežlyó.

7Dios, Bennen' nape' dot yeḻa' wak, zóaḻene' žo'o.

Dios na' che Jakob ẕkache' chawe'e žo'o.

8Le da ḻé'elele da' ka' ben X̱anžon'.

Le wia dan' bene' ḻo yežlyó dan' žonen ga žebanlžo.

9Ẕzoa žie' wdiḻe ka' žákgaken do ẕente yežlyó.

Žichje' da' ka' ẕsegak yag ntóche'do' ka',

na' ẕzoẕjwe' yag ntoche' ka' che wdiḻe,

na' ẕzeye' karro ka' che wdiḻe.

10Ẕnna Dios: “Le soa žize, na' le nnezle naka' Dios.

Napža' yeḻa' wak ka da' zej nape yógo'te yež ka'.

Napža' yeḻa' wak ka da' zej nape benne' dot yežlyó.”

11Dios, Bennen' nape' dot yeḻa' wak, zóaḻene' žo'o.

Dios na' che Jakob ẕkache' chawe'e žo'o.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index