Search form

SALMOS 59

1X̱ana' Dios, beslá neda' ḻo na'gak benne' ka' bi ẕḻé'egekle' neda' chawe'.

Beslá neda' ḻo na'gak benne' ka' ẕdíḻ-ḻengake' neda'.

2Beslá neda' ḻo na'gak benne' ka' žóngake' da' ẕinnj.

Beslá neda' ḻo na'gak benne' wet benách ka'.

3Žénegekle' gótgake' neda'.

Zej ndobe benne' waḻe ka' nich tíḻ-ḻengake' neda',

kege dan' nbaga'a ẕia, na' kege ni'a che da' ẕinnj da' bena' neda', X̱ana' Dios.

4Ḻa'kze bi be bena' chegak benne' ka', žon byéngake' góngake' neda' ẕia.

Bebán, na' da ga zoa' ni, na' ḻe'elo' da' žóngake'.

5Le', X̱ana', Dios chegak benne' zan ka' žjake' ḻo wdiḻe,

na' Dios chegak benne' Israel ka',

bebán nich wsaka' zi'o benne' yógo'te yež ka'.

Bi yeyache' ḻáže'lo' yógo'te benne' ka' ẕží'igake' chio' Le', na' žóngake' da' ẕinnj.

6Ẕḻá'gake' kate' žen wbíž, na ẕbéžeya'agake'

ka žongak beko' ka', na' žéchjgekle' yež.

7Bwia nga, da' ẕcháḻjgake' naken ka da' žeyébgake'.

Diža' ẕnnágake' zej naken ka ya ntoche' ka'.

Ẕẕnnágake': “Bi zoa no benne' yenle' chežo.”

8San Le', X̱ana' Dios, wẕiẕo' chegak benne' ka'.

Gon ditjlo' Le' benne' yógo'te yež ka'.

9Benne' ka' bi ẕḻé'egekle' neda' chawe' zej nake' waḻe.

Neda' wx̱én ḻaža'a Le', dan' žape chi'o neda'.

10Dios, Bennen' žeyache' ḻáže'le' neda', yide', na' gákḻene' neda'.

Dios gone' ga ḻe'ela' da' gak chegak benne' ka' bi ẕḻé'egekle' neda' chawe' kan žak ḻaža'a.

11Bi goto' benne' ka', nich bi gaḻ ḻáže'gak benne' chia' ka' da' ka' žono'.

Besḻás benne' ka' ḻen yeḻa' wak chio', na' ben ga chejchégwgake'.

X̱anto' Dios, Le' žape chi'ikzo' neto'.

12Ben ga chíx̱gekle' ḻo yeḻa' ẕka'n ẕen kwíngake',

ni'a che doḻa' da' žóngake' ḻo da' ẕcháḻjgake',

na' ni'a che diža' x̱iwe' ka', na' da' wen ḻaže' da' ẕnnágake'.

13Bžia yi' ḻégake' ḻo yeḻa' ẕža'a chio'.

Bžia yi' ḻégake' nich biž nníta'gake'.

Ben ga gákbe'egekle' Le' ẕnna bi'o ẕa'só Jakob ka'.

Ẕnna bi'o dot yežlyó nga.

14Ẕḻá'gake' kate' žen wbíž, na' ẕbéžeya'agake'

ka žongak beko' ka', na' žéchjgekle' yež.

15Ẕdágake' ka benne' ka' ẕdágakze', žíljgake' da' gáwgake'.

Cha' bi žéljgeklen', dot yel žesbága'gake' ẕia toe' yetóe',

16san neda' goḻkza' che yeḻa' wak chio',

na' zildo' wká'n ẕena' yeḻa' žeyache' ḻaže' chio', dan' gókḻeno' Le' neda',

na' wdape chi'o neda' kate' wžé' zédḻe'ela'.

17Le' žon chocho' neda', na' goḻkza' chio', Dios.

Žape chi'o neda', na' žeyache' ḻáže'lo' neda'.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index