Search form

SALMOS 75

1“Žóx̱keno'”, že'to' Le', Dios: “žóx̱keno'.”

Ẕzenlto' benách ka' zóaḻeno' Le' neto',

na' beno' da' ka' žóngaken ga žebanlto'.

2Ẕnna Dios: “Bzoa' ža wchi'a ḻaža'a benne' ka'.

Wchi'a ḻaža'a ḻo da' nak chawe'.

3Ḻa'kze x̱o' dot yežlyó, na' x̱ize yógo'te da' de,

gona' ga ga'n choch x̱ni'a yežlyón'.

4Žapa' benne' yaḻ ḻaže' ka': Bi sa' ḻáže'le da' ẕen.

Žapa' benne' wen da' ẕinnj ka': Bi wká'n ẕen kwinle.

5Bi wx̱én ḻáže'le yeḻa' waḻe chele.

Bi gakle benne' ḻaẕdo' zide ka'.”

6Bi za' yeḻa' ẕen gan ẕḻa' wbíž, na' gan ženen,

na' bi zan' ḻo latje dache.

7Dios nake' Benne' wchi'a ḻaže'e benne' ka'.

Ẕka'ne' ka'ze to benne', na' ẕka'n ẕene' yetóe'.

8Dios nox̱e' to ẕiga', da' nžan' x̱is uba waḻ, dan' zejḻasen yeḻa' ẕža'a chie'.

Wlaljen', na' benne' wen da' ẕinnj ka' yé'jgaken'.

Yé'jgaken' na' zejte yebižten,

9san neda' wzenkzla' benne' ka',

na' goḻa' da' we ḻawa' Dios che Jakob.

10Wchinnje' yeḻa' wak chegak benne' wen da' ẕinnj ka',

san yesgóleže' yeḻa' wak chegak benne' chawe' ka'.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index