Search form

SALMOS 81

1Ḻen yeḻa' žebele le goḻ che Dios, Bennen' žon choche' žo'o.

Ḻo yeḻa' ba nez chele le kwéžeya'a ḻaw Dios chegak ẕa'só Jakob.

2Le goḻ, na' le kapa' yiddo' ka'.

Le chinn x̱tan da' ka' žóḻ-ḻenle.

3Le wkweže lozgak bia ka' kate' nak byo' že'n,

dan' naken ža žónteze žonžo lni la'y.

4Naken to da' žon byene gongak benne' Israel ka',

dan' bchi'le Dios gongak ẕa'só Jakob ka'.

5Bzoen' ka to da' wḻoé'elen ẕa'só Jwsé ka' da' ben Dios katen' bžójgake' ḻo yežlyó Egipto,

gan benla' to x̱tíža'gak benne' ka' da' bi bejni'ila'.

6Ẕnna Dios: “Beká'a ywa' da' bdá'gake' x̱kóže'lgak benne' chia' ka'.

Beslá' benne' chia' ka' ḻo na'gak benne' ka' bkóngekle' ḻégake' žin.

7Ḻo da' wẕáka'le, bḻižle neda', na' gókḻena' ḻe'e.

Becheba' chele gan wzóa' to ḻo bejw gasj katen' wnnéḻe'e wzió',

na' wẕí' bi'a ḻe'e gan de bej nis da' nzin' Meriba.

8Le yenle, benne' chia' ka',

na' wzejni'ila' ḻe'e, benne' Israel ka',

cha' žaz ḻáže'le si'le da' ẕnnia'.

9Bi si' ḻo na'le dios ka' chegak benne' yež yobl ka'.

Bi wzó ẕible ḻawgak dios ka' chegak benne' zi'to' ka'.

10Neda', Dios chele, naka' X̱anle.

Bebeja' ḻe'e ḻo yežlyó Egipto.

Le wsaljw žoa'ale, na' gonna' da' gawle,

11san benne' chia' ka' bi béngake' da' wnnía'.

Benne' Israel ka' bi wyáz ḻáže'gake' si' ḻo ná'gake' x̱tiža'a.

12Che ḻen wléj yichja' benne' ka' dan' gókgake' ḻaẕdo' zide.

Béngake' da' wdán ḻáže'gakze'.

13Chela' wzé naggak benne' chia' ka' da' wnnía',

na' chela' bengak benne' Israel ka' da' bchaḻja',

14na' ka' gaze wžía yi'a benne' ka' bi ẕḻé'egekle' ḻégake' chawe',

na' tíḻ-ḻena' benne' ka' ẕdíḻ-ḻengake' ḻégake'.”

15Chela' bengak benne' Israel ki,

na' benne' ka' ẕžá'agake' X̱anžo Dios góngake' kan ẕnna x̱tíže'e,

(san zej nbage'e ẕia to chi'ize),

16na' Dios gone' ga gawgak benne' chie' ka' ẕoa' stribe cháwe'ḻe'e,

na' gone' ga yéljgekle' da' ẕix̱ che bez.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index