Search form

SALMOS 86

1X̱ana' Dios, bze nag, na' benle chia',

dan' ẕzaka'a neda', na' žiážjela'.

2Bwia neda' dan' naka' chio'.

Dios chia', beslá neda', wen žin chio', dan' žx̱en ḻaža'a Le'.

3X̱ana' Dios, beyache' ḻaže'l neda',

dan' žḻiža' Le' dot ža, dot yele.

4Ben ga yebéḻe'ela' neda', wen žin chio',

dan' ẕzoa kwina' ḻo no'o Le', X̱ana' Dios.

5Nako' Le' chawe', X̱ana' Dios, na' ženít ḻawo'o neto',

na' žeyache' ḻáže'tezlo' benne' ka' žḻížgake' Le'.

6X̱ana' Dios, benle da' ẕcháḻjḻena' Le',

na' bze nag da' ẕnnabla' Le'.

7Ḻo ža kwe' zedḻa' wḻižkza' Le',

dan' žechébekzo' Le' chia'.

8X̱anto' Dios, bi zoa no benne' nake' dios ka nako' Le'

na' bi zoa no benne' gak gone' ka nak da' žono' Le'.

9Beno' Le' benne' ka' nníta'gake' yógo'te yež ka'.

Ḻá'gake', na' wká'n ẕéngake' Le', X̱anto' Dios,

na' wká'n ẕéngake' La la'y chio',

10dan' nako' ẕen, na' žono' da' žonen ga žebanlto'.

Tozo' Le' nako' Dios.

11Bsedle neda' da' žak ḻažo'o gona', X̱ana' Dios,

na' gona' da' naken dot da' li chio'.

Bchi'le ḻáẕda'wa' nich žeba' La la'y chekzo' Le'.

12Dot ḻaža'a wká'n ẕenkza' Le', X̱ana' Dios,

na' wká'n ẕenkza' La la'y chekzo' Le' to chi'ize,

13dan' žeyache' ḻáže'tezlo' neda',

na' besló' be' da' nakkza' ḻo yi' gabíl.

14X̱ana' Dios, benne' ka' ẕka'n ẕen kwíngake' ẕdíḻ-ḻengake' neda'.

Zej nake' benne' yichj ža'a ka',

na' žénegekle' gótgake' neda',

na' bi ẕžébegake' Le',

15san Le', X̱ana' Dios, žeyache' ḻáže'lo' neto'.

Nako' ẕen ḻaže', na' bi ẕžo'o to chi'ize,

san žeyache' ḻáže'tezlo' neto', na' nako' dot ḻi ḻaže'.

16Bwia kan žak chia', na' beyache' ḻaže'l neda'.

Benn neda' yeḻa' wak chio', neda' wen žin chio',

na' wdape chi'i neda', ẕi'n no'le wen žin chio'.

17Bḻoe'el neda' to da' gak bian' gak chawe' chia',

na' ben ga benne' ka' bi ẕḻé'egekle' neda' chawe' ḻé'egeklen', na' yedoé'egekle',

dan' Le', X̱ana' Dios, gókḻenkzo' neda', na' beyón ẕeno' neda'.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index