Search form

SALMOS 88

1X̱ana' Dios, Le' žeslakzo' neda'.

Dot ža dot yel žḻiža' Le'.

2Benle da' ẕchaḻja' ḻawo' Le',

na' bze nag da' žḻiža' Le'.

3Žedó ḻaža'a ḻo da' bi nak chawe' da' žaken chia', na' ba zoa' gata'.

4Ẕḻé'egekle benne' ka' neda' ka to benne' gat, dan' žatḻe'e ni'a na'a.

5Nga'na' ka'ze ladjw benne' gat ka'.

Naka' ka benne' ka' gótgake' ḻo wdiḻe, na' zej die' ḻo yežw ba ka',

benne' ka' biž žezá' ḻažo'o, Dios, chégake', na' biž zej yoe'e ḻo no'o Le'.

6Žak chia' ka bzoakzo' neda' to ḻo yežw gže',

gan nak choḻ, na' nakḻe'en gže'.

7Žekla' ẕžá'aḻi'o neda'.

Da' žak chia' naken kan žetja' ẕan nisdo' dan' ẕgo'nḻe'en.

8Beno' ga bebíga'gak lježa' ka' gan zoa'.

Beno' neda' ka to da' žesgotlen benne' ka'.

Naken chia' ka nyejwa' liž ya, na' bi gak yežoja'.

9Ẕchoḻ yej ḻawa' ni'a che da' ẕzáka'ḻi'a.

Yógo'te ža žḻiža' Le', X̱ana' Dios.

Ẕchis na'a ḻawo' Le'.

10¿Ḻen yeḻa' wak che ya'abá gákḻeno' benne' gat ka'?

¿Že'gak benne' gat ka' Le': “Žóx̱keno'”?

11¿Ẕchaḻjgak benne' ka' zej ngache'e yežw ba che yeḻa' ži'i ḻaže' chio'?

¿Ẕchaḻjgak benne' ka' zej yoe'e latje choḻ chegak benne' gat ka' che da' ḻi ḻaže' chio'?

12¿Yeyónbia'gak benne' ka' zej yoe'e latje choḻen' ka nak da' ẕente da' žono'?

¿Yeyónbia'gak benne' zej yoe'e gan bi zoa no benne' žesá' ḻaže'e nakkzo' chawe'?

13San neda' žḻiža' Le', X̱ana' Dios.

Yógo'te zile da' ẕnnabla' Le' ženlen ḻawo' Le'.

14¿Biẕ chen' žebéj yichjo' neda', X̱ana' Dios?

¿Biẕ chen' bi ẕwio' neda' nich gákḻeno' neda'?

15Ẕzáka'ḻi'a, na' ba zoa' gata'.

Kate' ne naktia' bi' kwide' ẕzáka'ḻi'a

dan' bsako'o Le' neda', na' žedó ḻaža'a.

16Žekla' ẕžá'aḻi'o neda'.

Da' ẕchebo' neda' benen ga bedó ḻaža'a.

17Zej nyechjle da' ki neda' dot ža.

Žsáka'gaken neda' gáte'teze.

18Beno' ga bebíga'gak lježa' ka' gan zoa',

na' toze da' nak choḻ zóaḻenen neda'.

Dižaʼ chaweʼ kub len Salmo kaʼ

© 2002, Wycliffe Bible Translators, Inc. More Info | Version Index